சத்தான வெண்டைக்காய் சாதம் செய்வது எப்படி?

பல்வேறு வகையான சாதங்கள் செய்து சுவைத்திருப்பீர்கள். அந்தவகையில் இன்று த்தான வெண்டைக்காய் சாதம் செய்வது எப்படி என்று பார்க்கலாம்.

தேவையான பொருட்கள்
வெண்டைக்காய் - 100 கிராம்,
உதிரியாக வடித்த சாதம் - 1 கப்,
கெட்டியான புளிக்கரைசல் - 1 மேசைக்கரண்டி,
மஞ்சள் தூள் - அரை தேக்கரண்டி,
மிளகாய் தூள் - 1 தேக்கரண்டி,
காய்ந்த மிளகாய் - 4,
கடலைப் பருப்பு - 1 தேக்கரண்டி,
பட்டை - 2,
கடுகு - 1 தேக்கரண்டி,
கறிவேப்பிலை - சிறிது,
எண்ணெய் - 1 மேசைக்கரண்டி,
உப்பு - தேவைக்கேற்ப.

செய்முறை
வெண்டைக்காயை இரண்டாகப் பிளந்து வந்துவிடாமல் லாவகமாக வகிர்ந்து வைக்கவும். கடாயில் எண்ணெய் சேர்த்து, சூடானதும் வெண்டைக்காயை போட்டு 2 நிமிடங்கள் வதக்கவும். லேசாக வெந்ததும், அதில் மஞ்சள் தூள், உப்பு, புளிக்கரைசல், மிளகாய் தூள் சேர்த்து வதக்கவும். குறைந்த தணலில் வைத்து, மசாலா வெண்டைக்காய் முழுவதும் படிகிற படி வதக்கித் தனியே எடுத்து வைக்கவும்.

இன்னொரு கடாயில் எண்ணெய் விட்டு, கடுகு, காய்ந்த மிளகாய், கடலைப் பருப்பு, பட்டை, மஞ்சள் தூள் சேர்த்துப் பொன்னிறத்துக்கு வறுக்கவும். இதில் சாதம், கறிவேப்பிலை சேர்த்துக் கிளறி, வெண்டைக்காய் மசாலாவையும் சேர்த்துக் கிளறவும். குறைந்த தணலில், சாதம், மசாலா எல்லாம் சேர்ந்து வரும்படி 5 நிமிடங்களுக்குக் கலந்து பரிமாறவும்.